K-5

Heiðurskappamót K5 haldið 21. mars 2009

2009-05-04T21:17:00.003Z

Kappi Þyngd 1. lyfta 2. lyfta 3. lyfta kappi Sæti

67,5 kg. flokkur
Encho Plamenov Stoyanov 65,4 100 130 140 214,1% 14,1% (Heiðurskappi)
Ísak Elvarsson 64,3 120 130 150 233,3% 33,3% (Heiðurskappi)

75 kg. flokkur
Erling Óskar Kristjánsson 66,2 100 120 135 203,9% 3,9% (Heiðurskappi)
Kristján Ragnar Kristjánsson 68,5 100 130 150 219,0% 19,0% (Heiðurskappi)
Valdimar Snær Stefánsson 72,5 110 125 172,4% -27,6%

82,5 kg. flokkur
Ásgeir Örn Nordquist 78,9 160 170 215,5% 15,5% (Heiðurskappi)
Fannar Freyr Bjarnason 84 160 170 202,4% 2,4% (Heiðurskappi)
Guðmundur Geir Þórarinsson 78,5 175 185 200 254,8% 54,8% (Heiðurskappi) 1.sæti
Haukur Valdimar Pálsson 78,6 160 170 185 235,4% 35,4% (Heiðurskappi)
Jóhann Ísberg 78 100 120 153,8% -46,2%
Teitur Gunnarsson 79,3 160 170 180 227,0% 27,0% (Heiðurskappi)

90 kg. flokkur
Einar Beinteinsson 89,7 90 100 110 122,6% -77,4%
Gregor Vajdic 89,8 180 190 210 233,9% 33,9% (Heiðurskappi)
Hallgrímur Þór Katrínarson 88,5 180 200 220 248,6% 48,6% (Heiðurskappi) 2.sæti
Ingólfur Hannes Guðjónsson 87,1 160 180 190 218,1% 18,1% (Heiðurskappi)
Hákon Jónsson 87,4 160 175 200,2% 0,2% (Heiðurskappi)

100 kg. flokkur
Birgir Þór Halldórsson 93,1 190 210 222 238,5% 38,5% (Heiðurskappi) 3.sæti
Gísli Rafn Guðfinnsson 91 90 100 110 120,9% -79,1%
Jón Björn Björnsson 92,9 200 215,3% 15,3% (Heiðurskappi)
Karvel Arnarsson 99,1 100 150 151,4% -48,6%

110 kg. flokkur
Karl Jóhann Gunnarsson 109,9 140 180 195 177,4% -22,6%
Bjarki Ómarsson 98,3 140 150 170 172,9% -27,1%
Ómar al Lahham 97,8 140 160 170 173,8% -26,2%

125 kg. flokkur
Gunnar Sigurjónsson 118,8 200 220 240 202,0% 2,0% (Heiðurskappi)
Sigurður G. Jökulsson 116,7 100 125 140 120,0% -80,0%
Skúli Ármannsson 122,6 200 220 179,4% -20,6%

Ofurkappi er Guðmundur Geir Þórarinsson 2,54 x eigin þyngd

Frábært Heiðurskappamót

2009-03-21T22:58:00.002Z

Af 28 skráðum keppendum mættu 26 til leiks af öllum stærðum og gerðum, þyngdum og líkamlegu atgervi.
Það var skemmtilegur andi yfir mótinu og það gekk alveg undra hratt fyrir sig.
Mótið stóð í klukkutíma og tíu mínútur sléttar.
Ótrúlega fáar ógildar lyftur og flestir komu sjálfum sér á óvart og settu persónuleg met.

Af 26 keppnisköppum urðu 16 heiðurskappar.
Það er kappar sem toguðu tvöfalda líkamsþyngd sína eða meira.
Guðmundur Geir Þórarinsson varð Ofurkappi mótsins en hann togaði 200kg í lokalyftu en vegur sjálfur ekki nema 78,5kg.

Mikil tilþrif voru á mótinu og margar skemmtilegar lyftur í greininni.

Átveisla kappa var í Digraneskirkju um kvöldið.
Þar voru heiðurskappar heiðraðir og Ofurkappinn fékk verðlaunabikarinn "Óskarinn" til eignar.
"Óskarinn" lýtur út eins og Oscars-verðlaunin í Hollywood, nema að hann heldur á lárviðarsveig í stað sverðs.
"Óskarinn" er tileinkaður Óskari Sigurpálssyni sem var yfirdómari mótsins.
Á meðan á borðhaldi stóð, horfðu menn á video af keppninni, þar sem sjá mátti allar lyftur mótsins um daginn hjá nær öllum keppendum.
Nokkrir sluppu við myndatökuna þar sem tökumaður var ekki alveg tilbúinn í upphafi móts.
Samskot voru á átinu fyrir Einstök börn og safnaðist meira en ellefu þúsund krónur sem rennur óskipt til samtakanna.

2009-03-17T16:47:00.011Z

Það er dúndrandi þátttaka á mótinu og greinilegt að klúbburinn fær gott start á sínu fyrsta keppnismóti.

Eftirtaldir kappar eru skráðir á Heiðurskappamót K-5, laugardaginn 21. mars 2009 kl. 13
Nafn og þyngd í kg.

Almar Guðmundsson 75
Ásgeir Örn Nordquist 77
Birgir Þór Halldórsson 92
Bjarki Ómarsson 103
Einar Beinteinsson 90
Encho Plamenov Stoyanov 64
Erling Óskar Kristjánsson 68
Fannar Freyr Bjarnason 83
Gísli Rafn Guðfinnsson 91
Guðmundur Geir Þórarinsson 80
Gunnar Sigurjónsson 119
Gregor Vajdic 90
Hallgrímur Þór Katrínarson 84
Haukur Valdimar Pálsson 76
Hákon Jónsson 87
Ingólfur Hannes Guðjónsson 83
Ísak Elvarsson 63
Jóhann Ísberg 78
Jón Björn Björnsson 100
Jón Þorkelsson 80
Karl Jóhann Gunnarsson 107
Karvel Arnarsson 100
Kristján Ragnar Kristjánsson 68
Ómar al Lahham 102
Sigurður G. Jökulsson120
Skúli Ármannsson 125
Sævar Ómarsson 92
Teitur Gunnarsson 80
Valdimar Snær Stefánsson 69

2009-03-12T18:38:00.000Z

Heiðurskappamót K-5 verður haldið laugardaginn 21. mars kl. 13 í æfingarstöð Nautilus í kjallara Sundlaugar Kópavogs.
Til þess að öðlast titilinn “Heiðurskappi” þurfa kappar að lyfta tvöfaldri eigin líkamsþyngd í réttstöðulyftu.

Við viljum fyrir alla muni að allir kappar taki þátt í mótinu óháð því hvort þeir eiga möguleika á titlinum eða ekki.

Aðalatriðið er að skapa skemmtilega stemmningu á mótinu og vera með.

En til þess að öllum reglum sé réttilega framfylgt þarf að sjálfsögðu að skrá sig á mótið.

Öllum keppendum verður boðið í átveislu kappa um kvöldið kl. 20 gegn 100 kr. gjaldi (já, það er rétt skrifað – hundrað kall)
Við munum éta kjöt og kræsingar.

Við erum að leita að sal fyrir veisluna – svo ég mun senda ykkur nánar um staðsetningu átveislu síðar.
Það virðist vera vandi að fá sal þar sem ekki þarf að kaupa veitingar sem aðallega eru pasta og léttmeti.
Það hæfir ekki köppum K-5 J

Allir að vera með og skrá sig á netfangið adalkappi@simnet.is NÚNA!!!

Vigtun fyrir mótið fer fram bæði um morguninn (þá er hægt að vera óétinn og nýskitinn til að vera sem léttastur) og eins á mótstíma.

ALLIR KAPPAR ERU HVATTIR TIL AÐ VERA MEÐ.
GERUM ÞETTA AÐ FJÖLMENNASTA KRAFLYFTINGAMÓTI LANDSINS.

K-5 er nú þegar orðið stærsta kraftlyftingafélag landsins með 113 félaga sem vega yfir tíu tonn – og við stefnum enn hærra.

Með kappakveðju
Gunnar Sigurjónsson,
Aðalkappi K-5

Ps. Það verður baukur í átveislunni fyrir þá kappa sem vilja gauka klinkinu sínu eða meiru til “Einstakra barna”.
Það er frjálst framlag og mun bæði 100 kallinn og “klinkið” renna óskipt til þeirra.
Auk þess geta þeir kappar sem enn hafa ekki fengið bol fengið hann á mótinu með því að borga 100 kr félagsgjald.

Tafir á aðalfundi

2009-03-10T19:50:00.003Z

Eins og glöggir Kappar hafa séð þá hefur það tafist verulega að standa fyrir Heiðurskappamóti, Aðalfundi K-5 og Átveislu Kappa sem vera átti í byrjun mars.

Ástæðu tafanna má rekja til þess að stjórn K-5 ætlaði sér að hafa þessa atburði samhangandi á einum laugardegi.

Nú hefur Framkvæmdastjórn ÍSÍ hafnað lögum K-5 á þeim forsendum að hún "telur texta í lögunum ekki viðeigandi í lögum íþróttafélaga og óskar eftir því að lögin verði endursamin".

Stjórn K-5 er því sárlega móðguð og íhugar mjög alvarlega næstu aðgerðir.

Við munum að sjálfsögðu leitast við að fara friðsamlega að Framkvæmdastjórn ÍSÍ.

Allavega í fyrstu :)

Kappar þurfa þó ekki að óttast að stjórn K-5 sé tilbúin til að fórna þeim sérstaka anda og krafti sem í K-5 býr, þó svo lög okkar séu mjög svo ólík lögum annarra íþróttafélaga.

Við erum einfaldlega ekki eins og aðrir.

Og erum stolt af því.

Næsti atburður

2009-02-23T19:43:00.003Z

Gerið ykkur klár fyrir heiðurskappamót um miðjan mars.
Nú er um að gera að æfa réttstöðulyftuna þannig að kappar séu reiðubúnir að taka á því um miðjan mars mánuð. Líklega laugardaginn 14. mars. En það verður auglýst betur síðar.
Fylgist með auglýsingum hér eða í Nautilus æfingarstöðinni í kjallara sundlaugarinnar í vesturbæ Kópavogs.

Nýtt kraftlyftingafélag í Kópavogi

2009-02-08T23:22:00.000Z

Stofnun Kraftlyftingardeildar Breiðabliks
Samþykkt hefur verið að stofna nýja deild innan Breiðabliks sem hefur kraftlyftingar sem keppnisgrein að aðalmarkmiði. Önnur markmið eru almenn styrkleika- og vöðvaþjálfun, ásamt æskulýðsstarfi sem byggir á þríþraut, að fyrirmynd Íþrótta- og Ólympíuhreyfinga á hinum Norðurlöndunum.
Stofnfundur kraftlyftingadeildar Breiðabliks verður haldinn í fundarsal Breiðabliks á 2. hæð Íþróttahússins í Smáranum, mánudaginn 9. febrúar, kl. 20:00. Allir áhugasamir um æskulýðsstarf, almenna hreysti og kraftlyftingar, eru hvattir til að mæta.

Frábær kennsla hjá Óskari Sigurpálssyni

2009-01-31T17:02:00.002Z

Fyrsti skipulagði atburðurinn á vegum K-5, (Kraftlyftingaklúbbs kátra kappa í Kópavogi), tókst alveg frábærlega vel.
Hinn landskunni kraftlyftingamaður, Óskar Sigurpálsson annaðist um tilsögn í kraftlyftingum og þeir 13 kappar sem mættu fengu persónulega tilsögn frá meistaranum.

Hver og einn var skoðaður út frá stíl og atgervi.
Óskar gerði þær athugasemdir sem þurfa þótti.
Allir voru hæst ánægðir með tilsögnina.
Kunnum við honum hinar bestu þakkir fyrir að gefa okkur af tíma sínum og visku.

Það fer vel á því að byrja starf K-5 með kennslu í kraftlyftingum.
Það verður vonandi meira af slíku í framtíðinni, enda gerður mjög góður rómur að því sem við þarna nutum.

Þeir sem vilja verða Kappar og samþykkja markmið klúbbsins geta haft samband við Gunnar Sigurjónsson, aðalkappa með því að senda tölvupóst á adalkappi(hjá)simnet.is

Íslandsmót KRAFT í bekkpressu

2009-01-27T22:17:00.006Z

31.janúar 2009
Íslandsmótið í bekkpressu -
Íþróttamiðstöðinni Mosfellsbæ
Mót: kl.13:00 Vigtun: kl.11:00

Áhugasamir kíki á heimasíðu Kraft sem finna má hér

Gaman væri ef sem flestir kappar K-5 sæju sér fært að mæta í bolum merktum klúbbnum.
Ef ykkur vantar bol, hafið þá samband við Gunnar, aðalkappa.

Mótið fer reyndar fram á sama tíma og tilsögn Óskars Sigurpálssonar fer fram í Sundlaug Kópavogs í vesturbænum, en þeir sem ekki ætla að njóta tilsagnarinnar, fara að sjálfsögðu á mótið til að fylgjast með - nú eða keppa.

Félagið vex og dafnar

2009-01-27T18:46:00.003Z

Núna er heildarfjöldi kappa orðinn 77.
Heildarþyngd kappa er: 6.955 kg.

Tölurnar uppfærast hér hægra megin eftir því sem bætist í félagið.

Kennsla í réttstöðulyftu

2009-01-23T09:23:00.003Z

Í tilefni af því að til stendur að halda Heiðurskappamót í tengslum við Aðalfund K-5, mun félagið standa fyrir kennslu í réttstöðulyftu.

Allir Kappar eiga þess kost að taka þátt.
Óskar Sigurpálsson, kappi, mun annast tilsögn sem fram fer í æfingarsal Nautilus í kjallara Sundlaugar Kópavogs í vesturbænum.

Námskeiðið er ókeypis og mun Óskar kappkosta að segja eins mörgum Köppum til og kostur er.

Námskeiðið hefst kl. 13, laugardaginn 31. janúar.

2009-01-23T09:12:00.002Z

Lög Kraftlyftingaklúbbs kátra kappa í Kópavogi K-5
1. grein. Nafn félagsins er Kraftlyftingaklúbbur kátra kappa í Kópavogi. Skammstafað K-5. Lögheimili þess er á Hrauntungu 63, 200 Kópavogi, varnarþing og aðsetur er í Kópavogi.

2. grein. Markmið.
Markmið félagsins er að stuðla að kröftugum, heilbrigðum og glaðværum félagsanda meðal kraftlyftingarmanna. Félagið vill stuðla að því að kraftlyftingar séu almenningsíþrótt. Félagið vinnur að þessu með því að stuðla að reglulegum æfingum félagsmanna, kraftlyftingamótum þar sem félagsmenn fá tækifæri til þess að keppa innbyrðis og við aðra.Auk þess stendur félagið fyrir kátlegum átveislum fyrir félagsmenn.

3. grein. Félagar.
Félagar geta orðið allir þeir, karlar jafnt sem konur, sem lýsa stuðningi sínum við markmið félagsins með því að greiða félagsgjald.
Félagsmenn kallast “Kappar”. Félagatal kallast “Kappatal”.
Nafnbótinni “Heiðurskappi” má sæma kappa, eða aðra sem til þess hafa unnið, samkvæmt einróma samþykkt félagsstjórnar.Allir “kappar” sem lyfta meiru en tvöfaldri líkamsþyngd sinni í réttstöðulyftu eru sjálfkrafa “Heiðurskappar".
Hvorki K-5 sem félag eða “kappar” á vegum þess skulu taka sig of alvarlega og keppast eftir því að sýna kæti, samstöðu og glaðværð sín á milli og við félagsmenn annara kraftlyftingarfélaga.Ólund, sundurþykkja og fýla eru brot á lögum félagsins.

4. grein. Kosningarréttur og kjörgengi
Kosningarrétt og kjörgengi hafa þeir “kappar” sem eru í skilum við félagið og eru skráðir í “Kappatal”.“ Fari svo í atkvæðagreiðslu á félagsfundi eða aðalfundi að þau standi á jöfnum atkvæðum, ræður atkvæði "Aðalkappa".

5. grein. Stjórn.
Stjórn félagsins skipa 5 “kappar” kjörnir á aðalfundi.
Formaður sem kallast “Aðalkappi”
Varaformaður sem kallast “Varakappi”
Ritari sem kallast “Krassarakappi”
Gjaldkeri sem kallast “Kassakappi”
Meðstjórnandi sem kallast “Kjörkappi”

Stjórnarkjör fer fram á aðalfundi ár hvert og tekur ný stjórn til starfa í fundarlok.
Á aðalfundi skal “Aðalkappi” tilkynna fyrir hönd stjórnar hvort stjórn gefur kost á sér til áframhaldandi starfa fyrir félagið eða tilnefna aðra í stað einstaka eða fleiri stjórnarmanna. “Kappar” geta tilnefnt kjörgenga “kappa” til stjórnar.“Aðalkappi” skal kjörinn sérstaklega en aðrir “kappar” í stjórn án tilnefningar í stjórnarsæti.Stjórn skiptir með sér verkum á fyrsta fundi sínum eftir aðalfund.
Stjórn er ákvörðunarhæf ef meirihluti stjórnarmanna situr stjórnarfund.Aðalkappi” skal ávallt sitja stjórnarfund þar sem stjórn skiptir með sér verkum.
Með atkvæðagreiðslu á stjórnarfundi skal fara líkt og á aðalfundi.
Kjörtímabil allra stjórnarmanna eru 2 ár.
Oddatöluár skal kjörinn “Aðalkappi” (formaður), “Varakappi” (varaformaður) og “Krassarakappi” (ritari), hitt árið “Kassakappi” (gjaldkeri) og “Kjörkappi” (meðstjórnandi).

6. grein. Fjármál.
Reikningsár félagsins er almanaksárið.
Árgjald skal ákveðið á aðalfundi fyrir komandi ár.
Reikningar skulu endurskoðaðir af kjörnum skoðunarmönnum reikninga.
Skoðunarmenn reikninga kallast “Kassakannarar”.
Aðalfundur kýs tvo “Kassakannara” og einn til vara úr hópi "Kappa".
Gilda sömu reglur um kjör þeirra og stjórnarmanna.

7. grein. Lagabreytingar.
Tillögur um lagabreytingar skal bera fram á aðalfundi og skulu þær hafa borist stjórn félagsins amk. 4 vikum fyrir fundinn. Skulu þær sendar í tölvupósti til “kappa” samkvæmt “Kappatali” og ná aðeins samþykki aðalfundar ef atkvæðamagn er meira en 2/3 viðstaddra “Kappa” á aðalfundi.

8. grein. Fundir, mót og átveislur kappa.
Aðalfundur fer árlega fram í Sundlaug Kópavogs í febrúar.
Aðalfund skal boða með auglýsingu á Líkamsræktarstöðvum Nautilus í Kópavogi með minnst 10 daga fyrirvara.
Á dagskrá aðalfundar séu eftirtalin atriði í þessari röð:
1. Skýrsla stjórnar um starfsemi félagsins á liðnu starfsári.
2. Reikningsskil og samþykkt reikninga.
3. Tillögur stjórnar um starfsemi á næsta ári, fjárhagsáætlun og félagsgjöld.
4. Lagabreytingar.
5. Kosning stjórnar.
6. Kosning kassakannara (skoðunarmanna reikninga).
7. Önnur mál.

Almenna félagsfundi, mót eða átveislur “kappa” skal halda þegar stjórnin telur tilefni til eða þegar minnst 3 stjórnarmenn eða tvö tonn af “köppum” krefjast þess. Kröfu um fund skal leggja skriflega fyrir stjórn og skal kröfunnar getið í fundarboði.Almenna félagsfundi, mót og átveislur skal boða með auglýsingu á líkamsræktarstöðvum Nautilus með hæfilegum fyrirvara.
Við almennar atkvæðagreiðslur á fundum félagsins ræður meirihluti “kappa”.
Halda skal gerðabækur um alla félags- og stjórnarfundi.
Félagsfundargerðir skal lesa upp á næsta félagsfundi ef þess er óskað, en stjórnarfundargerðir skal leggja fyrir næsta stjórnarfund til samþykktar.
Stjórn félagsins skal halda “Kappatal” þar sem fram kemur skráð og þar með gildandi líkamsþyngd allra “kappa” félagsins og netfang.
Í “Kappatali” skulu “Heiðurkappar” tilgreindir sérstaklega.

Stjórn skipar árlega "átkappa" sem annast um átveislur á vegum félagsins og boðar til þeirra með 10 daga fyrirvara á líkamsræktarstöðvum Nautilus í Kópavogi.
Í átveislum á vegum K-5 sem að jafnaði skulu fara fram mánaðarlega, skal stjórn stuðla að almennri kátínu meðal “kappa” og kanna hvort “kappar” séu kátir á meðan á áti stendur. “Aðalkappi” getur fyrirvaralaust kallað til átveislu.

9. grein. Nefndir og sambandsaðild.
Stjórn félagsins getur skipað nefndir til sérstakra verkefna. Tilnefningar í nefndir séu skriflegar og fylgi þeim lýsing á verkefni svo og tímamörk.
Það er skylda “kappa” að taka tilnefningu í nefndir nema gildar ástæður séu fyrir hendi.
Félagið skal hlutast til um að fá aðild að ÍSÍ (Íþrótta- og Ólympíusambandi Íslands).
“Kappar” skulu því virða reglur ÍSÍ og keppa eftir þeim reglum sem ÍSÍ kann að setja þeim.

10. grein. Önnur ákvæði
Það sem ekki er kveðið á um í lögum félagsins skal fara eftir lögum og reglugerðum ÍSÍ.

11. grein. Félagsslit
Félaginu má slíta með lagabreytingu og renna þá eignir þess t.d. til aðila sem hafa markmið hliðstæð þeim, sem lýst er í 2. gr. þessara laga.

12. grein. Brot
Stjórn félagsins getur með meirihluta stjórnarmanna vikið “kappa” úr félaginu og/eða svipt hann nafnbótinni “Heiðurskappi”. Skal það tilkynnt á næsta aðalfundi eftir að ákvörðun stjórnar hefur verið tilkynnt og geta þá “kappar” hnekkt þeirri ákvörðun í atkvæðagreiðslu sem fram fer samkvæmt 4. grein þessara laga.

13. grein. Gildistími
Lögin voru samþykkt á stofnfundi K-5, á gamlársdag 31. desember 2008.

Heimasíða kátra kappa

2009-01-23T08:12:00.000Z

Þá er komin heimasíða fyrir "Kraftlyftingaklúbb kátra kappa í Kópavogi - K-5"
Hér munum við koma á framfæri upplýsingum til kappa ásamt því að birta myndir af mótum og átveislum Kappa.